19-njy noýabrda Türkmenistanyň daşary işler ministri Raşid Meredow Ýewropada Howpsuzlyk we Hyzmatdaşlyk Guramasynyň Baş sekretary Feridun Sinirliogly hem-de Sloweniýanyň Premýer-ministriniň orunbasary, daşary we Ýewropa işleri ministri Tanýa Faýo bilen telefon arkaly söhbetdeşlikleri geçirdi.
Söhbetdeşligiň barşynda şu ýylyň 12-nji dekabrynda Aşgabat şäherinde geçiriljek Halkara parahatçylyk we ynanyşmak forumynyň taýýarlyk meselelerine aýratyn üns berildi.
Şeýle hem Türkmenistanyň we ÝHHG-niň arasyndaky hyzmatdaşlygyň ileri tutulýan ugurlaryny ara alyp maslahatlaşyp, özara gatnaşyklaryň durnukly depginini we netijeli häsiýetini bellediler. Söhbetdeşler halkara giňişliginde tagallalary utgaşdyrmagyň ähmiýetine aýratyn üns berip, parahatçylygy, howpsuzlygy we durnukly ösüşi mundan beýläk-de berkitmäge gönükdirilen birnäçe meseleleri ara alyp maslahatlaşdylar.
Sloweniýanyň Premýer-ministriniň orunbasary, daşary we Ýewropa işleri ministri bilen söhbetdeşlikde ikitaraplaýyn gatnaşyklaryň giň gerimli ugurlary boýunça hyzmatdaşlygy mundan beýläk-de berkitmegiň mümkinçiliklerini ara alyp maslahatlaşyp, syýasy-diplomatik, söwda-ykdysady hem-de medeni-ynsanperwer ugurly hyzmatdaşlygy giňeltmäge bolan özara gyzyklanmalaryny beýan etdiler.
