Nintendo-nyň resmi YouTube kanalynda "Doganlar Super Mariolar Galaktikada" (The Super Mario Galaxy Movie) multfilminiň treýleri çykdy. Meşhur animasiýa blokbasteriniň dowamy 2026-njy ýylyň aprelinde çykar.
Film 2007-nji ýylda Wii konsolynda çykan Super Mario Galaxy wideo oýnunyň motiwlerine esaslanýar.
Multfilmde gahrymanlara Kris Pratt, Anýa Teýlor-Joý, Çarli Deý, Jek Blek, Bri Larson we başga-da birnäçe aktýorlar ses berdiler. Oňa "Doganlar Super Mario Kinoda" filminiň birinji bölüminiň üstünde işlän Aaron Horwat we Maýkl Ýelenik (Michael Jelenic) režissýorlyk etdi.
Super Mario oýnunyň ekranlaşdyrylan ilkinji bölümi 2023-nji ýylyň ýazynda çykyp, umumy girdejisi 1,36 milliard dollar boldy. Kassa ýygyndysy boýunça ol animasiýa filmleriniň arasynda "Doňan Ýürek 2" (Frozen 2), "Şir Şa" (The Lion King), "Tapmaça 2" (Inside Out 2) we "Neçža 2" (Ne Zha 2) atly filmlerden soň bäşinji orny eýeleýär.
