Kristofer Nolanyň geljekki “Odisseýa” filmini düşürmek üçin 2 million futdan gowrak plýonka gerek boldy – bu, takmynan, 609,6 kilometre barabar diýip, Rolling Stone habar berýär.
Filmiň düşürilişiniň köp bölegi açyk deňizde geçirildi.
“Biz Odisseýiň gämisiniň toparyny oýnaýan aktýorlary hakyky tolkunlara, hakyky ýerlere äkitdik. Hawa, deňiz çäksiz, aýylganç, ajaýyp we asuda. Biz bu syýahatlaryň adamlar üçin näderejede agyr bolandygyny we olaryň öwrenilmedik, karta ýüzüne geçirilmedik dünýäde amala aşyran ynam böküşini görkezmek isledik” – diýip, režissýor paýlaşdy.
Filmiň düşürilişi alty aý – fewraldan awgust aralygynda dowam etdi. Topar Marokkoda, Gresiýada, Italiýada, Maltada, Şotlandiýada we Ispaniýada işledi, düşürmek işleri Los-Anjelesde tamamlandy.
Filmiň sýužeti gadymy grek şahyry Gomeriň adybir romanyna esaslanýar. Wakanyň merkezinde Mett Deýmonyň ýerine ýetirmeginde Itakanyň patyşasy Odisseý bolup, ol Troýa urşundan soň öýe dolanmaga synanyşýar we mifiki jandarlar hem hudaýlar bilen ýüzbe-ýüz bolýar.
Beýleki rollarda Tom Holland, Zendaýa, Enn Heteueý, Lupita Niongo, Robert Pattinson, Şarliz Teron we beýleki aktýorlar bar.
Filmiň premýerasy 2026-njy ýylyň 17-nji iýulyna meýilleşdirilýär. “Odisseýa” doly derejede IMAX kameralaryna düşürilen ilkinji film bolar. Entek çykmazdan ozal Nolanyň filmi petekleriň deslapky satuwyndan 1,5 mln dollar getirdi.
