Ýaponiýanyň iň uly ýedi awtoulag öndürijisi Donald Trampyň administrasiýasy tarapyndan girizilen import üçin gümrük nyrhlarynyň ýokarlandyrylmagy sebäpli girdejisiniň takmynan 1,5 trillion ýenasyny (takmynan 9,7 milliard dollar) ýitirdi. Nikkei neşiriniň ýazmagyna görä, bu COVID-19 pandemiýasy döwründen bäri tutuş pudak üçin girdejiniň ilkinji gezek peselmegini alamatlandyrdy.
Ýaponiýanyň harytlaryna girizilen 27,5% amerikan nyrhlary Ýaponiýanyň maliýe ýylynyň birinji ýarymy hasaplanýan aprel aýyndan sentýabr aýyna çenli seljerilen ähli döwürde diýen ýaly güýjünde galdy. Diňe 16-njy sentýabrda paçlar 15% azaldyldy.
Ýedi kompaniýanyň - Toyota, Honda, Nissan, Mazda, Mitsubishi, Subaru we Suzuki kompaniýalarynyň arassa girdejisi ýylyň birinji alty aýynda 2,1 trilliona sähel ýetmedi, bu bolsa geçen ýyl bilen deňeşdirilende, takmynan 30% peselendigini aňladýar. Girdeji yzygider ikilenji ýyl azalýar.
Nikkei-iň baha bermegine görä, 2026-njy ýylyň 31-nji martyna çenli tamamlanýan maliýe ýylynyň ahyryna çenli ýapon awtoulag senagatynyň ABŞ-nyň nyrhlaryndan ýaňa umumy ýitgileriniň 2,5 trillion ýena (takmynan 16,25 milliard dollar) bolup biljekdigini çaklaýar.
