Hytaýdaky Lonvi Biosciences barlaghanasynyň barlagçylary "adamyň ömrüni 100 ýaş edip, hatda ondanam uzaldyp biljek" dermanyň döredilendigini mälim etdiler diýip, The New York Times habar berýär.
Şençžen şäherinde ýerleşýän barlaghana üzüm dänesiniň ekstraktynda bar bolan prosianidin C1 (PCC1) birleşmesine esaslanýan garrylyga garşy gerdejikleri işläp taýýarlady. Şanhaýda geçirilen barlaglaryň maglumatlaryna görä, prosianidin C1 syçanlaryň ömrüni umumylykda 9,4%, ömrüniň belli bir döwründe bejergä başlananda 64,2% ýokarlandyrdy.
Üzüm dänesiniň peýdalydygy ylma köpden bäri mälim: onuň ýagy kosmetikada, şol sanda derä ideg etmekde we garramagy haýallatmakda ulanylýar. Lonvi Biosciences önüminde zombi diýilýän öýjükleri - stres ýa-da zeper ýetme sebäpli bölünmek ukybyny ýitiren garry öýjükleri ýok edip biljek “izolirlenen molekulalaryň” bardygyny öňe sürýär. Bu öýjükler bedenden tebigy ýagdaýda çykmaýar we dokumalaryň çişmegine sebäp bolýar.
"150 ýaşamak belli bir derejede hakykata laýyk. Birnäçe ýyldan ol hakykata öwrüler" - diýip, kompaniýanyň baş tehniki işgäri Lýu Sinhua aýtdy.
NYT-nyň habaryna görä, Hytaýda uzak ömür sürmek boýunça edilýän iş, köplenç, aldawçylyk ýaly kabul edilýärdi. Indi döwlet we hususy maýa goýumlary, şeýle hem köpçüligiň gyzyklanmasynyň artmagy netijesinde bu ugur lukmançylygyň kanuny we käte girdejili pudagyna öwrülýär.
2024-nji ýylda Hytaýda ömrüň ortaça dowamlylygy 79 ýaşa ýetdi, bu dünýä boýunça görkezijiden bäş ýaş ýokarydyr.
