15-nji noýabrda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa Pakistanyň Türkmenistandaky ilçisi hanym Farýal Legari bilen duşuşdy.
Oguljahan Atabaýewa Gaznanyň ýurdumyzda çagalara saglygy goraýyş, bilim, durmuş ulgamlarynda berilýän hyzmatlaryň mundan beýläk-de ösdürilmegine üns berýändigini belledi.
Gaznanyň bejeriş işleri boýunça wise-prezidenti şu ýylyň dekabr aýynda “Awaza” milli syýahatçylyk zolagynda “Häzirki zaman jemgyýetinde zenanlaryň orny: durnukly ösüşiň bähbidine halkara hyzmatdaşlygyny ösdürmek” atly halkara maslahatynyň geçiriljekdigini aýdyp, bu forumyň zenanlaryň jemgyýetde ornuny pugtalandyrmak barada pikir alyşmak üçin netijeli meýdança boljakdygyny belledi.
Ilçi gender deňligini üpjün etmek boýunça Türkmenistanyň durmuşa geçirýän işlerine Pakistanda ýokary baha berilýändigini belläp, bu maslahatyň üstünlikli geçirilmegini arzuw etdi.
Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy 2021-nji ýylda döredilip, çagalara, hususan-da, ene-atasynyň howandarlygyndan jyda düşen çagalara hemmetaraplaýyn kömek berýär. Häzirki wagta çenli Gaznanyň serişdeleriniň hasabyna çagalara 700-den gowrak lukmançylyk operasiýalary ýerine ýetirildi.
Şeýle hem Gaznanyň binýadynda Sagaldyş-dikeldiş merkezi we inklýuziw çagalar bagy hereket edýär. Diňe şu ýylyň dowamynda Merkezde 900-e ýakyn çaga tölegsiz esasda sagaldyş-dikeldiş bejergisini aldy.
