Şu gün, 16-njy noýabrda Prezident Serdar Berdimuhamedow iki günlük döwlet sapary bilen Özbegistana geldi. Daşkent şäheriniň howa menzilinde döwlet Baştutanymyzy Özbegistanyň Prezidenti Şawkat Mirziýoýew we Türkmenistanyň wekiliýetiniň agzalary garşyladylar. Howa menziliniň Prezident terminalynda ýokary derejeli myhmany resmi garşylamak dabarasy boldy.
"Türkmenistan" gazetiniň elektron neşirinde habar berlişi ýaly, Türkmenistanyň Prezidentiniň Daşkende bu gezekki saparynyň maksatnamasy dürli mazmunly çärelere baýdygy bilen tapawutlanýar. Günüň birinji ýarymynda Serdar Berdimuhamedow Merkezi Aziýa döwletleriniň Baştutanlarynyň ýedinji konsultatiw duşuşygyna gatnaşar. Ertir bolsa ýokary derejeli türkmen-özbek gepleşikleriniň geçirilmegine garaşylýar. Şeýle-de saparyň çäklerinde Türkmen-özbek serhetýaka söwda merkezini işe girizmek dabarasy guralar.
Ýeri gelende bellesek, «Merkezi Aziýa döwletleriniň Baştutanlarynyň konsultatiw duşuşygy» atly mehanizmi döretmek başlangyjy 2017-nji ýylyň sentýabrynda öňe sürlüpdi. Şondan bäri sebitiň Liderleri 2018-nji ýylyň martynda Gazagystanda, 2019-njy ýylyň noýabrynda Özbegistanda, 2021-nji ýylyň awgustynda Türkmenistanda, 2022-nji ýylyň iýulynda Gyrgyzystanda, 2023-nji ýylyň sentýabrynda Täjigistanda, 2024-nji ýylyň awgustynda Gazagystanda guralan sammitlere gatnaşdylar.
