Türkmen döwlet binagärlik-gurluşyk instituty ýurduň ýokary we orta hünär okuw mekdepleriniň talyplarynyň arasynda «CodeMaster 2025» hakatonyny geçirer.
Bäsleşik 4-5-nji dekabrda onlaýn arkaly toparlaýyn ýaryş görnüşinde geçiriler. Bäsleşige her okuw mekdepden 4 talypdan ybarat bolan bir topar gatnaşyp biler. IT-ýumuşlary çözmäge hakatona gatnaşyjy toparlara 3 sagat wagt berler.
Talyplaryň işlerine eminler tarapyndan esasy bäş ugurlar: programmanyň interfeýsiniň owadanlygy, ulanmakda ýönekeýligi we oňaýlylygy, programma üpjünçiliginiň işiniň tizligi, maglumatlaryň goraglylygynyň üpjün edilişiniň hili, programmanyň göwrümi boýunça baha berler.
Bäsleşigiň netijeleri boýunça oňa gatnaşyjylaryň arasynda Baş baýragyň eýesi kesgitleniler. Şeýle hem iň oňat toparlara iki sany I we iki sany II orunlar hem-de üç sany III orunlar berler. Hakatonyň ýeňijileri Türkmen döwlet binagärlik-gurluşyk institutynyň degişli derejeli diplomlary we sowgatlary bilen sylaglanylar.
«CodeMaster 2025» hakatona gatnaşmak isleýänler institutyň tdbgi.codemaster2025@gmail.com elektron salgysyna haýyşnama ugradyp, 26-njy noýabra çenli bellige alynmalydyrlar. Haýyşnamalar guramaçy ýokary okuw mekdebiň saýtynda ýerleşdirilen I goşundy boýunça resmileşdirilmelidir. Şeýle hem bu saýtdan bäsleşigiň geçirilişi hem-de oňa gatnaşmagyň düzgünleri barada doly maglumat alyp bolar. Habarlaşmak üçin telefon belgiler: +99362665547; e-mail: sedahojayev06@gmail.com.
