Türkmenistanyň Pekindäki ilçihanasynda «Lu Ban ussahanasy» (Luban Workshop) üçin enjamlaryň ilkinji tapgyryny ibermek baradaky şertnama gol çekmek dabarasy geçirildi. Bu ussahana Aşgabadyň Ýagşygeldi Kakaýew adyndaky Halkara nebit we gaz uniwersitetiniň binýadynda işläp başlar. Şertnama gol çekilmegi taslamanyň iş ýüzünde durmuşa geçirilip başlanmagyny aňladýar.
Dabara Türkmenistanyň Hytaýdaky ilçisi Parahat Durdyýew, Siýan Nebit uniwersitetiniň wise-prezidenti Çžan Žunzýun hem-de Hebeý Nebit hünär-tehniki uniwersitetiniň prorektory Ma Sýançaý gatnaşdy.
Ilçi Durdyýew gazanylan ösüşiň ähmiýetini belläp, taslamanyň möhüm ornunyň bardygyny nygtady.
«Lu Ban ussahanalary» — Hytaýyň hünär-tehniki bilim ulgamyndaky milli brendidir we «Bir guşak, bir ýol» başlangyjynyň çäklerindäki ynsanperwer hyzmatdaşlygyň möhüm bölegi hasaplanýar. Türkmenistanda dörediljek ussahana nebitgaz, senagat we energetika ugurlary boýunça hünärmenleri taýýarlamakda strategik merkez bolar.
Türkmen ilçisi ilçihananyň bu taslamanyň mümkinçiliklerini doly peýdalanmak, hünär bilimi ulgamyny ösdürmek we halkara hyzmatdaşlygy giňeltmek ugrunda ähli taraplaýyn goldaw bermegini dowam etdirjekdigini belledi.
Hytaý tarapynyň wekilleri şertnama gol çekilmeginiň taslamanyň durmuşa geçirilmegini çaltlandyrjakdygyna ynam bildirdiler.
Şeýle hem wise-prezident Çžan Žunzýun «Bir guşak, bir ýol» bilelikdäki ylmy laboratoriýasyny HNGU-nyň düzüminde döretmek teklibini öňe sürdi. Bu başlangyç türkmen tarapynyň goldawyna mynasyp boldy.
