Hytaý deňiz şemaly elektrik stansiýalarynyň energiýasy bilen işleýän dünýäde täjirçilik maksatly ilkinji suwasty maglumat merkezini işe girizdi. Bu desga Şanhaýyň kenarýakasynda ýerleşýär.
Taslama 226 million dollar möçberinde maýa goýuldy. Gurluşyk işleri 2025-nji ýylyň oktýabrynda tamamlandy, fewral aýyndaky synaglardan soň, maglumat merkezi geçen hepde doly derejede täjirçilik işine başlady.
Kuwwaty 24 MWt bolan toplum deňziň takmynan 35 metr çuňlugynda ýerleşdirildi. Onda emeli aňyň wezipeleri, 5G torlary we uly göwrümli maglumatlary işlemek üçin niýetlenen 2000-e golaý serwer gurnaldy.
Enjamlary sowatmak üçin deňiz suwy ulanylýar, bu bolsa adaty kondisioner ulgamlaryny ulanmazdan, ýylylygy tebigy ýol bilen çykarmaga mümkinçilik berýär.
Maglumat merkezi desga üçin zerur bolan elektrik energiýasynyň bir bölegini üpjün edýän deňiz şemal elektrik stansiýalary bilen birleşdirildi.
Işläp düzüjiler şeýle ulgamlary işletmegiň tehniki kynçylyklar bilen baglanyşyklydygyny belleýärler. Enjamlar ýokary basyşa we poslama (korroziýa) täsirine döz gelmeli, suw astyndaky hyzmat ediş bolsa ýerüsti desgalara garanyňda has çylşyrymlydyr. Munuň üçin ulgam uzakdan dolandyrylýan we ätiýaçlandyrylan germetik modullaryň esasynda guruldy.
