Italiýanyň Hökümeti elektrik naprýaženiýesiniň halkara ölçeg birliginiň adyny «woltdan» «wolta» diýip üýtgetmek başlangyjy bilen çykyş etdi.
«Politico» neşiriniň habar bermegine görä, bu başlangyjyň esasy maksady — görnükli italýan fizigi, himigi we fiziology Alessandro Woltanyň (1745–1827) familiýasyny doly we dogry görnüşde dikeltmekden ybarat. Alym häzirkizaman batareýalarynyň we akkumulýatorlarynyň nusgasy bolan hemişelik toguň dünýäde ilkinji himiki çeşmesini — wolt sütünini dörediji hökmünde tanalýar.
Häzirki wagtda bu ölçeg birligi halkara derejesinde «volt» görnüşinde ulanylýar. Italiýanyň Sanly özgertmeler ministri Alessio Buttiniň aýtmagyna görä, alymlaryň hormatyna dakylan köp sanly ölçeg birlikleri familiýany doly görnüşde saklaýar — meselem, gers, nýuton ýa-da watt. Rim bu babatda häzirki dakylyp ýörlen ady lingwistik taýdan nädogry diýip hasaplaýar.
Italiýa bu üýtgetmäni ilki bilen milli derejede tassyklamagy, soňra bolsa Halkara ölçegler we agramlar býurosyna ýüz tutmagy meýilleşdirýär. Bu teklibi 2026-njy ýylyň oktýabrynda geçiriljek guramanyň Baş konferensiýasynyň ara alyp maslahatlaşmasyna çykarmak göz öňünde tutulýar.
Italýan hökümeti bu başlangyjyň esasan simwoliki we medeni häsiýete eýedigini, onuň milli ylmy mirasy öňe sürmek bilen baglanyşyklydygyny aýratyn belleýär.
Şol bir wagtda, bu üýtgetme diňe ölçeg birliginiň adyna degişlidir. Elektrik ulgamlarynyň iş ýörelgeleri hem-de ölçeg ulgamynyň özi öňküligine galar.
