Apple kompaniýasy iPhone-da hemra aragatnaşygynyň mümkinçiliklerini giňeltmegiň üstünde işleýär. Bloomberg-iň žurnalisti Mark Gurmanyň aýtmagyna görä, kompaniýa hemralary gyssagly jaňlardan daşary hem ulanmaga mümkinçilik berjek birnäçe tehnologiýany öwrenýär.
Apple smartfonlar üçin hemra tehnologiýalary bilen eýýäm on ýyl bäri gyzyklanýar, bu hem 2022-nji ýylda Emergency SOS funksiýasynyň peýda bolmagyna getirdi. Indi kompaniýa bu tehnologiýany has ösdürmek isleýär.
Kompaniýanyň içinde Globalstar ýa-da SpaceX ýaly daşarky prowaýderlere garaşly bolmazdan, hususy hemra hyzmatlaryny hödürlemek pikiri ara alnyp maslahatlaşyldy. Ýöne ýolbaşçylyk “Apple-iň aragatnaşyk operatory däldigi we özüni operator hökmünde alyp barmaly däldigi” baradaky netijä geldi.
Gurman hususy hemra tehnologiýalarynyň kompaniýa birnäçe artykmaçlyklary berip, üçünji taraplara garaşlylygy azaldyp biljekdigini belleýär. Apple-de häzirki wagtda işlenýän tehnologiýalaryň arasynda şu aşakdakylar bar:
- ·Üçünji tarap programmalary üçin freýmwork – işläp düzüjilere öz programmalaryna hemra aragatnaşygyny goşmaga mümkinçilik berer.
- ·Hemralar arkaly Apple Maps-de nawigasiýa – ulanyjylar öýjükli aragatnaşyga birikmezden ýa-da kartany öňünden ýüklemezden kartada ugurlary belläp biler.
- ·Habarlar bilen alyşmagyň giňeldilen mümkinçilikleri – hemra arkaly tekst we surat ibermek.
- ·Aragatnaşygyň hilini ýokarlandyrmak – hemra aragatnaşygy diňe bir açyk howada däl, eýsem awtomobilde ýa-da ýapyk binada işlär.
- ·5G NTN (Non-Terrestrial Networks) goldawy – hemralary ýerüsti torlaryň hereket ediş zolagyndan daşary aragatnaşyk üçin ulanmaga mümkinçilik berer.
Žurnalist bu tehnologiýalaryň haýsy tapgyrdadygyny we iPhone-da haçan peýda boljakdygyny aýdyňlaşdyrmady.
