Apple kompaniýasy arzan bahaly MacBook çykarmagyň üstünde işleýär. Bu barada Bloomberg neşiri çeşmelerine salgylanyp habar berýär.
Täze noutbuk web sahypalaryny görkezmek, resminamalar bilen işlemek, multimedia faýllaryny ýeňil redaktirlemek ýaly ýokary güýç talap etmeýän gündelik işler üçin niýetlenýär.
Maglumata görä, kompaniýa häzirki wagtda “J700” kody bilen tanalýan noutbugy synagdan geçirýär. Ol daşary ýurt üpjün edijileri tarapyndan irki önümçilik tapgyrynda durýar. Täze modeliň 2026-njy ýylyň ilkinji ýarymynda satuwa çykarylmagy meýilleşdirilýär.
Mark Gurmanyň ýazmagyna görä, bu MacBook has ýönekeý komponentler bilen üpjün ediler: iPhone-nyň prosessory, has pes hildäki LCD displeý we häzirki Mac modellerinden iň kiçi ekran — takmynan 13,6 dýuýmly MacBook Air-den hem birneme kiçi.
Apple ilkinji gezek noutbukda iPhone-nyň prosessoruny ulanýar — öň kompaniýa Mac kompýuterleri üçin aýratyn M seriýaly çipleri döredýärdi. Bloomberg-niň maglumatlaryna görä, içki synaglar iPhone-nyň çibiniň eýýäm birnäçe ýyl ozal Mac-larda ulanylan M1-denem has gowy işleýändigini görkezdi. Mundan öň iPhone-nyň prosessorlary diňe iPad-larda ulanylypdy.
Bloomberg arzan MacBook-yň bahasynyň müň dollardan ep-esli aşak boljakdygyny — takmynan 600 dollar töwereginde boljakdygyny ýazýar. Bu iPad-i (başlangyç derejesi) Magic Keyboard Folio bilen ýa-da ChromeOS ulgamy bar Chromebook bilen deňeşdirip bolýar.
Apple kompaniýasynyň wekili bu maglumatlar baradaky teswirden ýüz öwürdi.
Bu model Apple üçin ilkinji arzan bahaly noutbuk bolar. Kompaniýa öň premium-segmente gönükdirilen, ýokary girdejili enjamlar öndürip gelýärdi. Şonuň üçin 2025-nji ýylyň üçünji çärýeginde Apple dünýä kompýuter bazarynyň takmynan 9%-ini eýeläpdi we Lenovo, HP we Dell-dan soň dördünji ýerde durýardy.
