Beýik Britaniýanyň patyşasy Karl III Angliýanyň milli ýygyndysynyň öňki futbolçysy Dewid Bekheme futbolyň we britan jemgyýetiniň öňünde bitiren hyzmatlary üçin rysarlyk derejesini berdi. Dabara 4-nji noýabrda Berkşir graflygyndaky Windzor galasynda geçirildi diýip, BBC mediakorporasiýasy habar berdi.
Beýik Britaniýada rysarlyk tituly döwlet gullugyndan we ylymdan başlap, medeniýete, sporta we haýyr-sahawata çenli dürli ugurlarda ýurduň öňünde bitirilen görnükli hyzmatlar üçin berilýär. 50 ýaşly Bekhemi sylaglamak baradaky çözgüt 13-nji iýunda Karl III-niň resmi doglan güni mynasybetli yglan edildi. Şol gün hökümet döwlet baýraklarynyň täze laureatlarynyň sanawyny hödürledi.
Bekhem sportda gazanan üstünlikleri we işjeň haýyr-sahawat işleri üçin ser adyna mynasyp boldy. Onuň eýýäm Britaniýa imperiýasynyň ordeniniň ofiseri ady bolan aýaly Wiktoriýa dabarada geýer ýaly Bekhem üçin kostýum döretdi. Türgeniň aýtmagyna görä, patyşa onuň eşigine ýokary baha berdi.
2013-nji ýylda karýerasyny tamamlamak bilen, Bekhem futbol taryhynda uly yz galdyrdy. Ol “Mançester Ýunaýtedde”, Madridiň “Realynda”, “Milanda”, “Los-Anjeles Gelakside” we “Pari Sen-Žermende” oýnady, alty gezek Angliýanyň premýer-ligasyny utdy we 1999-njy ýylda Çempionlar ligasynyň ýeňijisi boldy. Häzir ol Lionel Messiniň oýnaýan “Inter Maýami” klubunyň egindeş eýesidir.
