Şotlandiýanyň Peýsli şäherinden bolan 22 ýaşly futbol janköýeri Kreýg Fergýuson ABŞ-nyň tutuş çägini pyýada kesip geçdi. Bu barada «WBUR» radiostansiýasy habar berýär.
Ýaş ýigit fewral aýynyň ahyrynda Los-Anjelesden ýola düşdi we 109 günüň dowamynda 5630 km-den gowrak aralygy pyýada geçip, Bostona baryp ýetdi. Şotlandiýaly ýigit tutuş ýoly milli egin-eşigi — kiltde geçdi we ýol ugrunda Arizona, Kolorado, Ogaýo, Nýu-Ýork we Waşington ştatlaryna baryp gördi. Marafon 12-nji iýunda günortan sagat ikilerde Bostonyň «Boston-Kommon» seýilgähinde tamamlandy.
Maksat — ruhy saglyk
Fergýuson üçin esasy itergi, erkekleriň ruhy saglygy bilen baglanyşykly meselelere ünsi çekýän «Scottish Action for Mental Health» haýyr-sahawat guramasy üçin serişde toplamak boldy. Kreýg bu ýörişini ýedi ýyl ozal öz janyna kast etmegi netijesinde dünýäden öten iň ýakyn dostunyň kakasynyň hatyrasyna bagyşlady.
«Men hemişe oglanlara duýgularyňy görkezmegiň, kyn günleri başdan geçirmegiň we ýönekeý adam bolmagyň gowşaklyk däldigini görkezmek isledim. Gaýtam, bu hakyky güýçdür» — diýip, Fergýuson aýdýar.
Şotlandiýalynyň başlangyç maksady 1 million funt sterlinň toplamakdy. Ýörişiň jemleýji hepdesiniň başynda hasapda puluň diňe ýarysy bardy, emma 11-nji iýunda syýahatçy şahsyýet bilen Şotlandiýanyň ilkinji ministri Jon Suinni jaň etdi we ýurduň hökümetiniň gurama 400 müň funt möçberinde uly haýyr-sahawat geçiriljekdigini habar berdi. Netijede, 12-nji iýunyň ir säherine çenli umumy ýygnanan serişdeler 1,058 million funtdan geçdi we artmagyny dowam etdirdi.
Pellehanada Kreýg Fergýusony şotland milli eşikli we futbol formaly muşdaklar köpçüligi wolynka sazlarynyň astynda garşyladylar.
Fergýuson üçin bu ilkinji şeýle tejribe däl: 2024-nji ýylda ol şonuň ýaly usul bilen Glazgodan Mýunhene, Ýewropa çempionatynyň oýunlaryna pyýada barypdy. Amerikadaky ýörişi oňa meşhur adamlar — aýdymçy Lýuis Kapaldi we wäşi, öz ady bilen meňzeş Kreýg Fergýuson bilen duşuşyklar, şeýle hem Nýu-Ýorkda Şotlandiýanyň we Boliwiýanyň ýygyndylarynyň arasyndaky ýoldaşlyk duşuşygynyň öňüsyrasynda teňňe zyňmaga mümkinçilik bermegi bilen ýatda galdy.
Janköýeriň yhlasy boşuna bolmady: Şotlandiýanyň ýygyndysy ilkinji duşuşygynda Gaitiniň toparyny 1:0 hasabynda ýeňdi. Topar 1998-nji ýyldan bäri ilkinji gezek dünýä çempionatyna çykmagy başardy.
