Nike kompaniýasy öňümizdäki 2026-njy ýylyň futbol boýunça Dünýä çempionatyna bagyşlanan «Ssenariýany täzeden ýazmak» («Rip the Script») atly 6 minutlyk täsirli mahabat filmini tanyşdyrdy. Bu wideorolikde onlarça meşhur türgenler we dünýä ýyldyzlary surata düşdi.
Taslama gatnaşyjylaryň arasynda Kriştianu Ronaldu, Kilian Mbappe, Winisius Žunior, Erling Holand, Wirdžil wan Deýk, Zlatan Ibrahimowiç, LeBron Jeyms, Erik Kantona, reper Trewis Skott, Kim Kardaşýan, aktýor Çenning Tatum we adybir serialyň gahrymany Ted Lasso ýaly meşhurlar bar.
Ssenariýa görä, mahabat roliginiň surata düşüriliş işleri režissýoryň gözegçiliginden çykýar. Futbolçylar top oýnamaga gyzygyp, wakalary özbaşdak ösdürip başlaýarlar, ýöne ahyrynda olar ýene-de öňlerinde goýlan wezipä dolanýarlar.
Mahabatyň awtorlary filme futbol medeniýetine degişli köp sanly ýatlamalary we özboluşly pursatlary goşupdyrlar. Sahnalaryň birinde Erling Holandyň gol salanda edýän özboluşly hereketi görkezilýär. Şeýle hem rolikde Erik Kantonanyň «Kristal Pelas» toparyna garşy oýundaky galmagally wakadan soň çarlak guşy barada aýdan meşhur sözleri ýaňlanýar.
Aýry-aýry pursatlar Kilian Mbappe we Kriştianu Ronaldua bagyşlanypdyr. Ssenariýa boýunça Mbappe öz oýny barada pikir alşylýan pursatda studiýada peýda bolýar, Ronaldu bolsa Wirdžil wan Deýk bilen çaknyşandan soň, bir öýüň içine düşýär we şol öý soňra partlaýar. Şondan soň portugaliýaly ýyldyz «Still D.R.E.» aýdymynyň astynda daşary çykýar.
Mahabatda «Çelsiniň» ýarym goragçysy Koul Palmer hem görünýär, emma bu futbolçy Angliýanyň milli ýygyndysynyň Dünýä çempionaty üçin kesgitlenen resmi düzümine girip bilmändi.
Nike kompaniýasy durnukly ýagdaýda dünýä birinjiliklerine bagyşlap, uly göwrümli mahabat kampaniýalaryny taýýarlaýar. Braziliýada geçirilen 2014-nji ýylyň Dünýä çempionaty üçin taýýarlanan mahabat hem olaryň iň meşhurlarynyň biri hasaplanýar.
