Ýewropada “Ýylyň awtomobili” bäsleşiginiň emin agzalary 2026-njy ýylyň baş tituly üçin finalçylary yglan etdi. Gysga sanawa eýýäm ÝB-niň bazarynda elýeterli bolan ýa-da tiz wagtdan satuwa çykjak ýedi täze model girdi. Sylaglama dabarasy 9-njy ýanwarda Brýusseldäki awtosalonyň çäklerinde geçiriler.
Şeýlelikde, finala Citroen C5 Aircross, Fiat Grande Panda, Mercedes-Benz CLA, Škoda Elroq, Dacia Bigster, Kia EV4 we Renault 4 çykdy.
Bu awtomobiller Ýewropanyň, Aziýanyň we Amerikanyň brendlerinden 36 dalaşgär awtoulagyň arasyndan saýlandy.
Bäsleşigiň emin agzalary ÝB-niň 23 ýurdundan 60 žurnalistden ybarat. Barselonada soňky synaglar geçirilenden soň her bir emin agzasy ýeňijini kesgitlemek üçin iň gowy modelleriň arasynda 25 baly paýlar.
Finalçylaryň käbiri eýýäm bu bäsleşikde tapawutlanyp ýetişdi: geçen ýyl gysga sanawa Citroen, Renault, Dacia we Kia awtomobilleri girdi. Şol wagt eminler ýeňşi birbada iki modele – Renault 5 bilen onuň Alpine A290 wersiýasyna berdi.
