Türkmenistandan iki wekil Gazagystanyň Almaty şäherinde geçirilen “THE PLANET OF ART – 2025” Halkara ýaşlar sungat festiwalynyň ýeňijileri boldular. Ylham Orazmämmedow instrumental ugur boýunça, Aýşat Rejepowa bolsa horeografiýa ugrunda ýeňiş gazandy. Ýaşlaryň ikisi hem Maýa Kulyýewa adyndaky Türkmen Milli konserwatoriýasynyň ýanyndaky ýöriteleşdirilen sazçylyk mekdep-internatynyň okuwçylary.
Baýraklara dünýäniň 18 ýurdundan jemi 40 sany ýaş artist mynasyp boldy. Festiwal ÝUNESKO-nyň Klublarynyň we assosiasiýalarynyň Bütindünýä federasiýasynda Gazagystanyň başlyklyk etmeginiň çäklerinde guraldy. Saýlama tapgyryna 12–18 ýaş aralygyndaky müňlerçe artist gatnaşdy.
Final tapgyryna çykanlar Almaty şäherinde jemlenip, Gazagystanyň meşhur mugallymlarynyň we sungat ussatlarynyň goldawy bilen okuw we medeni maksatnama gatnaşdylar.
THE PLANET OF ART – 2025 festiwalynyň tapawutly aýratynlygy hökmünde janly simfoniki orkestr bilen bilelikde gala-konsert geçirildi. Konsert dünýäniň saz medeniýetini we milli kompozitorlaryň eserlerini birleşdiren teatrlaşdyrylan maksatnama hökmünde guraldy.
Taslama BMG-niň Baş Assambleýasy tarapyndan 2024-nji ýylyň sentýabrynda kabul edilen «Geljegiň Paktyny» ilerletmegiň çäginde durmuşa geçirildi. Festiwal Gazagystanyň medeniýet, maglumat we bilim ministrlikleriniň, şeýle hem beýleki döwlet we halkara hyzmatdaşlaryň goldawy bilen guraldy.
