“Ýoldaky jaý” uruşly filminiň režissýory Dag Laýman Amazon MGM studiýasy bilen ýüze çykan düşünişmezlikden soň filmiň dowamyny özbaşdak düşürmegi meýilleşdirýär.
Laýman 2024-nji ýyldaky film-remeýkiň kinoteatrlarda prokata goýbermezden, diňe Prime Video platformasynda çykarylandygyna nägilelik bildirdi. Onuň aýtmagyna görä, beren wadalaryna garamazdan Amazon kinoprokaty goldamaýar we filmi öz internet dükanynyň harytlaryny satmagyň guraly hökmünde ulanýar.
Deadline neşiriniň maglumatlaryna görä, režissýor eýýäm 1989-njy ýyldaky asyl filmiň dowamy – “Road House: Dylan” taslamasy üçin hukuk satyn aldy. Film üçin ssenarini R.Lens Hill ýazypdy. Eger ssenariçi Amazon bilen franşiza hukugy baradaky kazyýet işinde üstün çyksa, Laýman filmiň dowamynyň hususy wersiýasyny düşürip biler.
Şol bir wagtyň özünde, Amazon MGM hem “Ýoldaky jaý-2-niň” üstünde işlemegini dowam etdirýär, ýöne taslama ýakynda döredijilik düşünişmezlikleri sebäpli režissýor Gaý Riçini hem ýitirdi.
