Soňky on ýylda fransuz futbol klublary oýunçylaryň daşary ýurtlara transferinden tas 4 mlrd ýewro gazandy. Şeýle maglumatlary Halkara futbol federasiýasynyň hyzmatdaşy CIES Football Observatory hödürleýär.
CIES 2016-njy ýyldan başlap, soňky on ýylda transferlerden gelen girdejiler boýunça futbol çempionatlarynyň reýtingini düzdi. Şol bir wagtyň özünde, diňe halkara transferler hasaba alyndy – ýurduň içindäki şertnamalar statistika goşulmady. Reýtinge 50 çempionat girdi.
Sanawdan görnüşi ýaly, Fransiýanyň çempionaty diňe bir “uly Ýewropa bäşliginiň” ligalaryndan däl, eýsem futbol zehinleriniň esasy eksportçysy hasaplanýan Braziliýadan hem öňe geçdi. Fransuz klublary her ýyl daşary ýurtlara oýunçy satmakdan ortaça 400 mln ýewro gazanýar.
Braziliýanyň 10 ýylyň dowamynda transferlerden gazanan girdejisi bary-ýogy 2,6 mlrd ýewro boldy. Üçünji orny 2,24 mlrd ýewro bilen Ispaniýa eýeledi.
Bellemeli ýeri, Braziliýa 20 ýaşa çenli ýaş oýunçylaryň eksporty boýunça öňdebaryjylygy saklaýar – olar girdejileriň ýarysyny (50,1%) emele getirýär. Fransiýada ýaş zehinleriň paýy az – 26,4%. Ol ýerde, esasan, 21-23 ýaşyndaky futbolçylar köp satylýar, olar girdejileriň 39%-ini emele getirýär. Şeýle çemeleşme oýunçylara fransuz klublarynda tejribe toplamaga we daşary ýurtlarda güýçli ýaryşlara aňsat uýgunlaşmaga mümkinçilik berýär.
