Astanada L.N.Gumilýow adyndaky Ýewraziýa Milli uniwersitetiniň Pedagogika ýokary mekdebinde daşary ýurt dilleri (nemes we iňlis) ugry boýunça okaýan türkmenistanly talyp Hemra Parrykow «Türki halklaryň iň gowy talyby» atly halkara bäsleşiginiň ýeňijisi boldy.
Bäsleşik Gazagystanyň «Bilim-orkenieti» atly Milli innowasion ylmy-barlag merkeziniň guramagynda geçirildi diýip, Türkmenistanyň Bilim ministrligi habar berýär.
Hemra Parrykow birinji derejeli diplom, «Türk halklaryň iň gowy talyby» medaly we ýörite kubok bilen sylaglandy.
Bu üstünlik türkmen talyby üçin ilkinji üstünlik däl. Daşoguz welaýatynyň Gubadag etrabyndan bolan Hemra mundan öň hem birnäçe abraýly bäsleşikleriň we talyp baýraklarynyň ýeňijisi bolupdy. 2023-nji ýylyň dekabrynda ol daşary ýurtly talyplara berilýän «Kültegin» talyp hakynyň eýesi boldy. 2025-nji ýylyň mart aýynda hem «Bilim-orkenieti» merkezi tarapyndan «Merkezi Aziýanyň iň gowy talyby» diýen at bilen sylaglanyp, birinji derejeli diplom, medal we kubok aldy.
Mundan başga-da, 2025-nji ýylyň sentýabr aýynda H.Parrykow Özbegistanyň Milli ylym we bilim merkezi «ScientificAcademy» tarapyndan guralan halkara ylmy-amaly maslahatyna gatnaşdy. Bäsleşigiň netijeleri boýunça ol GDA derejesinde «Milli iftihar» («Milli buýsanç») medaly, ýörite sertifikat we ýadygärlik nyşany bilen sylaglandy.
