Pablо Pikassonyň “Gülli şlýapaly zenanyň heýkeli” atly kartinasy Pariždäki Drou auksionynda 32 million ýewro (takmynan 37 million dollar) satyldy, diýip Associated Press habar berýär.
Suratda Pikassonyň ylham çeşmesi we söýgülisi Dora Maaryň portreti çekilipdir. Suratkeş ony 1943-nji ýylyň iýulynda, Ikinji jahan urşy döwründe döretdi. Şondan bäri ol hususy maşgala kolleksiýasynda saklandy we soňky gezek 1944-nji ýylda satyldy.
Dora Maaryň portreti Pikassonyň “Şlýapaly zenan” eserler toplumyna degişlidir. Hünärmenleriň aýtmagyna görä, surat örän gowy ýagdaýda saklanypdyr – reňkler häzirem ýiti bolup, suratkeş ony ýaňy-ýakynda çekene meňzeýär.
Auksionyň başynda onuň çaklanylýan bahasy 9–11,6 million dollar bolupdyr. Netijede bolsa, soňky baha ähli garaşylýanlardan ýokary çykdy, ýöne şonda-da bu Pikassonyň auksionda satylan iň gymmat işi däl.
