“Mitçeller bilen maşynlaryň gapma-garşylygy” (The Mitchells vs. the Machines) animasion filminiň dowamy çykarylar. Variety neşiriniň habar bermegine görä, täze bölümiň režissýorlary hökmünde Jeý Pi Sans (“Garagol ýigitler 2”) we asyl filmiň ssenarisiniň üstünde işlän Gilýermo Martines çykyş eder.
Önümçilige 2026-njy ýylyň başynda başlamak meýilleşdirilýär.
2021-nji ýylda çykan birinji bölüm gyzyny kino-mekdebe äkitmek üçin ýol syýahatyna ugran maşgala barada gürrüň berýär. Ýöne olaryň ýoly adamzada garşy çykan emeli aň bilen howply çaknyşyga öwrülýär.
Premýeradan soň multfilm Netflix-iň iň meşhur animasion relizi boldy: ilkinji 28 günde oňa 53 mln adam tomaşa etdi. Multfilm tankytçylaryň hem ýokary bahalaryna mynasyp bolup, Esquire, Empire, IGN, Men’s Health, Screen Rant, Time Out, Rolling Stone we Vulture tarapyndan ýylyň iň gowy filmleriniň sanawyna girizildi.
“Mitçeller bilen maşynlaryň gapma-garşylygy” “Iň gowy animasion film” kategoriýasynda “Oskar” baýragyna dalaşgär görkezildi, ýöne Disney studiýasynyň “Enkanto” multfilminden yza galdy. Mundan başga-da, taslama beýlekiler bilen bir hatarda ýylyň iň gowy multfilmi, režissýorlyk we ssenariý üçin 8 “Enni” baýragyny (Annie Awards) aldy.
