Xiaomi kompaniýasy Redmi K90 Pro Max smartfonyny – seriýada iň ösen modeli hödürledi. Smartfon Snapdragon 8 Extreme Edition Gen 5 platformasynda guruldy we Redmi hatarynda 5 esse optiki zum bilen periskopik teleobýektiwe eýe bolan ilkinji smartfon boldy.
Redmi K90 Pro Max 120 Gs täzelenme ýygylygy, DC Dimming tehnologiýasy we Qingshan Eye Protection 3.0 goragy bilen 6,9 dýuýmlyk OLED displeýine eýe boldy. Yzky panelde metal çarçuwa we Sound by Bose ýazgyly dinamik bar. Öndüriji sabwufer bilen 2.1 akustik ulgamynyň bardygyny belleýär.
Esasy kamera 50 Mp Light Hunter 950 sensoryny, 50 Mp ultra giňburçly moduly hem-de 5 esse optiki we 10 esse gibrid zum bilen 50 Mp periskopik obýektiwi öz içine alýar.
Batareýanyň sygymy 7560 mA/sag bolup, 100 Wt çalt zarýad alşy, 50 Wt simsiz we 22,5 Wt çenli ters zarýady goldaýar.
Model üç reňkde – ak, gara, şeýle-de jins stilinde ýerine ýetirilen gök reňkde elýeterli bolar.
Esasy wersiýanyň (12 GB + 256 GB) bahasy 560 dollardan başlaýar, ýokary wersiýanyň (16 GB + 1 TB) bahasy 745 dollar.
Şeýle-de, kompaniýa “K seriýasynda iň kämil başlangyç smartfon” diýlip kesgitlenen Redmi K90 Standard Edition smartfonyny hödürledi. Ol Snapdragon 8 Elite platformasyna esaslanýar we 100 Wt zarýad goldawy bilen 7100 mA/sag akkumulýator hem-de 6,59 dýuýmlyk Super Pixel Full RGB displeýi bilen üpjün edildi.
Kamera üç moduldan ybarat: ikisi 50 Mp (esasy we teleobýektiw) we biri 8 Mp (ultra giňburçly). Şeýle-de, barmak yzynyň ultrases skaneri, stereodinamikler, NFC çibi we IP68 boýunça suwdan we tozandan gorag bar.
Model gara, gök, ak we ýiti benewşe reňklerde elýeterli. Bahalar 12 GB + 256 GB üçin 355 dollardan başlaýar we 16 GB + 1 TB üçin 545 dollara ýetýär.
