Türkmenistanyň bilim ministriniň orunbasary Azat Ataýewiň ýolbaşçylygyndaky wekiliýet iş saparynyň çäginde ABŞ-nyň Waýoming Döwlet uniwersitetine (University of Wyoming, UW) baryp gördi. Bu barada Türkmenistanyň Bilim ministrligi habar berdi.
Saparyň maksatnamasyna garşy almak dabarasy, uniwersitetiniň ýolbaşçylary bilen gepleşikler, tematik duşuşyklar, kampus jemgyýeti üçin ýörite çykyş we uniwersitetiň halkara topary bilen jemleýji duşuşyk girizildi.
Gepleşikleriň dowamynda taraplar hyzmatdaşlygyň esasy ugurlaryny we olaryň durmuşa geçirilmegi boýunça anyk ädimleri - hyzmatdaşlyk boýunça özara düşünişmek hakynda Ähtnamalarynyň taýýarlanylmagy, bilelikdäki okuw modullarynyň we akademiki alyş-çalyşlaryň ýola goýulmagy, WyoCourses/Canvas sanly platformasynyň bilelikde okatmak we okuw materiallaryny alyşmak üçin ulanylmagy ara alyp maslahatlaşdylar.
Wekiliýet şeýle hem Waýoming uniwersitetiniň Biznes kollejine baryp, “treýding-laboratoriýa”, talyplaryň dolandyrýan “öwreniji gaznasy” modeli, şeýle hem biznes analitika, serişdeleriň hereketiniň psihologiýasy we blokçeýn tehnologiýalary boýunça okuw maksatnamalary bilen tanyşdy.
Pedagogika ugrundaky duşuşyklarda dil taýýarlygy, inkýuziw bilimi ösdürmek, mekdebe çenli we başlangyç mugallymçylyk, «synp-synpa» görnüşindäki onlaýn sapaklaryň guramaçylygy, çakylyk leksiýalary we tomusky okuw maksatnamalary ara alnyp maslahatlaşyldy. Şeýle hem birleşdirilen okuw meýilnamalarynyň taýýarlanylmagy we usulyýet materiallarynyň alşylmagy barada ylalaşyk gazanyldy.
Saparyň netijeleri boýunça Waýoming Döwlet uniwersiteti bilen Türkmenistanyň iki ýokary okuw mekdebiniň — Döwletmämmet Azady adyndaky Türkmen milli dünýä dilleri instituty bilen Türkmen Döwlet maliýe institutynyň arasynda özara düşünişmek barada Ähtnamalara gol çekildi.
Geljek akademiki semestrde ilkinji synag taslamalarynyň — biznes analitika, maliýe sowatlylygy we blokçeýn tehnologiýalary boýunça okuw modullarynyň, şeýle hem dil taýýarlygy we inkýuziw pedagogika boýunça sapaklaryň işe girizilmegi meýilleşdirilýär. Taraplar netijeleri yzygiderli alyşmaga we hyzmatdaşlygy mundan beýläk-de ösdürmäge taýýardyklaryny tassykladylar.
