Türkmenistan – Owganystan – Pakistan – Hindistan (TOPH) gaz geçirijisi boýunça Owganystana türkmen gazyny 2027-nji ýylyň başynda iberip başlamak meýilleşdirilýär. Bu barada TAPI Pipeline Company Limited kompaniýasynyň baş direktory Muhammetmyrat Amanow «Türkmenistanyň nebiti we gazy – 2025» halkara maslahatynda eden çykyşynda aýtdy.
Gaz geçirijiniň yzynlygy 214 kilometr bolan türkmen bölegi eýýäm doly gurlup tamamlandy. Serhetabat – Hyrat aralygyndaky 153 kilometrlik Owganystan böleginiň gurluşygy başlandy we häzirki wagtda işjeň dowam edýär. M.Amanowyň sözlerine görä, esasy gurluşyk işleri indiki ýylyň soňuna çenli tamamlanar, şeýlelikde gazyň iberilişi 2026-njy ýylyň ahyrynda ýa-da 2027-nji ýylyň başynda başlanar.
M.Amanow, şeýle hem, Pakistan bilen alnyp barylýan gepleşikleriň ýagdaýy barada aýdyp geçdi.
«Biz Pakistanyň geljekki maýa goýumlaryny gorap biljek we maýa goýujylara hem-de maliýe guramalaryna — şol sanda döwlet edaralaryna we gaz ulag agentliklerine — ynam berjek möhüm ylalaşyklara goşulyşmagyna işjeň gatnaşýarys», diýip ol belledi.
Onuň bellemegine görä, gepleşikleriň 90%-den gowragy eýýäm ylalaşyldy we bu tapgyryň doly tamamlanmagy 2026-njy ýylyň birinji ýarymynda meýilleşdirilýär.
TOPH gaz geçirijisi «Galkynyş» gaz käninden ýylda 33 milliard kub metr gazy daşamaga niýetlenendir. Şondan 5 milliard kub metri Owganystana, 14 milliard kub metri bolsa Pakistan we Hindistana iberiler.
