Ferrari markasynyň aýratyn taslamalar bölümi tarapyndan diňe bir nusgada döredilen täsin SC40 superkary tanyşdyryldy. Täze model 296 GTB platformasyna esaslanýar we meşhur Ferrari F40 modeline hormat hökmünde döredilipdir — bu onuň adynda hem, daşky görnüşiniň aýratynlyklarynda hem aýdyň görünýär.
SC40 doly täzeden taýýarlanan kuzowa eýe bolup, 296 GTB-den diňe öň aýnanyň formasy we gapdal howa girişleri miras alyndy. Ulagyň dizaýnynda F40-yň nusgawy aýratynlyklary — burçly şekiller, ýumşak geçişli çyzyklar we faralaryň formasy aç-açan saklanyp galdy. Model üçin aýratyn ak öwüşginli reňk işlendi.
Salon bolsa 296 GTB bilen meňzeşdir, ýöne olaryň arasynda esasy tapawut — interýerde karbon-kewleriň giňden ulanylmagydyr. Bu hem F40-yň gurluş materiallaryna edilýän yşarat hökmünde saýlanyp alnan.
Tehniki taýdan SC40 296 GTB-e doly gabat gelýär: gibrid güýç enjamy 830 at güýjüni we 740 Nm tork öndürýän V6 hereketlendirijisine esaslanýar. Ulagyň gury agramy 1550 kg. 0-dan 100 km/s tizlige 2,9 sekuntda, 200 km/s tizlige bolsa 7,3 sekuntda çykýar. Iň ýokary tizligi 330 km/s-den ýokary.
Ferrari bu ýeke-täk SC40-yň kimiň sargyt edendigini hem-de onuň bahasyny mälim etmedi.
