Hytaýyň smartfon bazary 2025-nji ýylyň üçünji çärýeginde, geçen ýylyň degişli döwri bilen deňeşdirilende, 3% peseldi diýip, Omdia portalynyň analitikleri habar berýär. Şeýle-de bolsa, öňdebaryjy öndürijileriň arasyndaky bäsdeşlik güýçli bolup galýar we üpjünçilik möçberlerindäki tapawut kem-kemden azalýar.
Vivo içerki bazarda 18% paý bilen öňe çykyp, 11,8 million enjam satdy. Ikinji orunda Huawei (10,5 million, 16%), üçünji basgançakda bolsa bir ýylda iki orun ýokary galmagy başaran Apple (10,1 million, 15%) ýerleşýär. Ilkinji bäşligi Xiaomi (10 million) we Oppo (9,9 million) jemleýär.
Seljerijileriň belleýşi ýaly, bazardaky pese gaçyş yzly-yzyna iki çärýek dowam eder, ýöne döwlet tarapyndan berilýän goldawlar netijesinde ýagdaý durnuklaşýar. Arzanladyş möwsüminiň başlanmagy we täze flagman modelleriniň görkezilmegi bilen dördünji çärýekde satyşyň ýokarlanmagyna garaşylýar.
Huawei öz ekoulgamyny berkitmek maksady bilen HarmonyOS 5.0 operasion ulgamyna geçiş ulgamyny dowam etdirýär. Üçünji çärýekde öndürijiler giriş we orta kategoriýaly modellerini täzelediler we bazarda täze ýörelgeleri şekillendirdiler: Honor X70, Redmi Note 15 Pro, Vivo Y500 we Oppo A6 has uly (7000 mA·s-dan ýokary) batareýalar we suwdan, tozandan we ýere gaçmalardan goraýyş derejesi ýokarlandyrylan korpuslar bilen tapawutlanýar. Bu aýratynlyklar sarp edijileriň häzirki islegine laýyk gelýär.
Bilermenler bazaryň ortaça ösüşini, aýratyn-da dizaýna, kameralaryň mümkinçiliklerine we emeli aň funksiýalaryna bolan ünsüň artmagyna baglylykda, dowam etdirjekdigini çaklaýarlar.
