Täze iPhone 17 modelleri özünden öňki enjamlardan has meşhur bolup çykdy. Financial Times neşirine salgylanyp berilýän maglumatlara görä, üpjünçilik zynjyrynda täze Apple smartfonlaryna degişli sargytlar geçen ýylky iPhone 16-lara garanyňda has köp. Satuwyň ilkinji günlerinde Apple dükanynyň öňündäki nobatlar hem müşderileriň gyzyklanmasynyň ýokarydygyny tassyklaýar.
Bank of America-nyň seljerijileri iPhone 17-ä garaşmagyň ortaça wagtynyň geçen ýyl bilen deňeşdirilende takmynan 13% artandygyny habar berýär. Bu islegiň ep-esli ýokarlanandygyny görkezýär. Täze enjamlary öz torlary arkaly satýan aragatnaşyk operatorlary hem şu tendensiýany belleýär.
Visible Alpha-nyň seljermelerine görä, Apple-iň iPhone satyşyndan alýan girdejisi geçen maliýe ýylynda 4% ýokarlanyp, 209,3 mlrd dollara ýetdi. Şu ýylda bu görkeziji 5% artmak bilen 218,9 mlrd dollara ýetjek diýip çaklanýar. Bilermenler munuň sebäbini pandemiýa döwründe satyn alnan enjamlaryň täzelenmegi hem-de täze dizaýn we funksiýalara bolan gyzyklanma bilen düşündirýärler.
Visible Alpha-nyň çaklamasyna görä, Apple smartfonlarynyň ýyllyk satuw mukdary takmynan 235 million enjama barabar bolar. 2027-nji ýylda bu görkeziji 240 milliona çenli, onýyllygyň ahyrynda bolsa 260 milliona çenli artmagy mümkin. Eger ilkinji eplenýän iPhone şol döwürde bazara çykarylsa, bu ösüşde möhüm rol oýnap biler.
Apple-iň smartfonlary kompaniýanyň umumy girdejisiniň ýarysyndan gowragyny emele getirmegini dowam etdirýär. Bu görkeziji geçen maliýe ýylynyň ahyrynda 390 mlrd dollara ýetmeli. iPhone böleginiň girdejisiniň artmagy ABŞ bilen Hytaýyň arasyndaky söwda dartgynlygy sebäpli ýüze çykýan maliýe basyşlaryny bölekleýin ýeňletmäge kömek eder.
