24-nji oktýabrda Prezidentimiz Serdar Berdimuhamedow Italiýa Respublikasyna resmi sapar bilen bardy.
Italiýanyň Fýumiçino “Leonardo Da Winçi” halkara howa menzilinde Türkmenistanyň Prezidentini Italiýanyň resmi adamlary, şeýle hem ýurdumyzyň resmi wekiliýetiniň agzalary garşyladylar.
Rime saparynyň çäklerinde döwlet Baştutanymyz “Altare della Patria” ýadygärlik binasynda näbelli esgeriň guburyna gül goýdy.
Ýadygärlik binasynyň öňünde döwlet Baştutanymyzy Italiýa Respublikasynyň goranmak ministri Gwido Krozetto we beýleki resmi adamlar garşyladylar.
Goranmak ministrliginiň serkerdesi Türkmenistanyň Prezidentini garşylamak dabarasynyň başlanýandygyny yglan etdi. Iki ýurduň Döwlet senalary ýaňlandy.
Goranmak ministrliginiň serkerdesi Türkmenistanyň Prezidentiniň sapary mynasybetli harby nyzama düzülendigi barada hasabat berdi.
Serdar Berdimuhamedow Italiýanyň Döwlet baýdagyny sarpalady.
Soňra döwlet Baştutany “Altare della Patria” ýadygärlik binasynda näbelli esgeriň guburyna gül çemenini goýdy.
Soňra dostlukly ýurduň goranmak ministri döwlet Baştutanymyzy dabara gatnaşýan Italiýanyň ýokary derejeli harby wekiliýeti bilen tanyşdyrdy.
Dabaranyň ahyrynda iki ýurduň Döwlet senalary ýaňlandy.
Türkmenistanyň Prezidentiniň Italiýanyň azatlygy we garaşsyzlygy üçin janyny gurban eden gahrymanlary sarpalamagy Türkmenistanyň halkynyň dostlukly ýurduň taryhyna we milli gymmatlyklaryna çuňňur hormatynyň aýdyň beýany boldy.
