Netflix we Chernin Entertainment ABŞ-nyň 35-nji Prezidenti Jon Kennediniň kakasy, işewür we diplomat Jozef Patrik Kennedi-ulynyň durmuşyna bagyşlanan “Kennedi” drama serialynyň üstünde işläp başlady diýip, Deadline ýazýar.
Taslamada baş keşbi Maýkl Fassbender (“Şöhratsyz deýýuslar”, “Stiw Jobs”) ýerine ýetirer. Ssenarini Sem Şou (“Manhetten” serialy) ýazar, režissýor hökmünde Tomas Winterberg (“Aw”, “Ýene bir gezek”) çykyş eder.
Taryhçy Fredrik Logewallyň “JFK: Amerikan asyrynda şahsyýetiň kemala gelşi, 1917-1956” kitabyna esaslanýan serial sekiz bölümden ybarat bolar. Sýužetiň merkezinde Kennedi nesilşalygyny döreden şahsy durmuş, gatnaşyklar, bäsdeşlik we betbagtçylyklar durar.
Birinji möwsümiň wakalary 1930-njy ýyllarda, Jozef Kennedi Gymmatly kagyzlar we biržalar boýunça komissiýanyň başlygy, ABŞ-nyň Deňiz komissiýasynyň direktory we uruşdan öňki döwürde Beýik Britaniýada ilçi wezipelerini eýelän döwürleri ýaýbaňlanar. Şeýle-de, onuň aýaly Rouza we çagalaryna, şol sanda geljekki Prezident Jon Kennedä üns berler.
Taslama köp ýagdaýda Netflix-iň “Täç” taryhy serialynyň üstünliginden ruhlandy. Ol britan monarhiýasyna bagyşlanan bolup, 87 nominasiýadan 24 “Emmi” baýragyny aldy.
