Fransiýada ýurduň demirgazyk-günbataryndaky Langr şäherinde “Deni Didronyň magaryf öýi” muzeýi talandy. Bu waka barada France Info habar berýär.
20-nji oktýabrda irden işe gelen muzeý işgärleri giriş gapysynyň we altyn hem kümüş teňňeli witrinalaryň döwlendigini gördi. Jenaýatkärler muzeýde goýlan teňňeleriň bir bölegini ogurlapdyr.
Gürrüň 1790-njy ýyldan 1840-njy ýyl aralygynda zikgelenen 319 altyn we 1633 kümüş teňňeden ybarat kolleksiýa barada gidýär. Bu teňňeler muzeý hazynasyna girýärdi – olar 2011-nji ýylda muzeýiň binasynyň abatlaýyş işleri wagtynda tapyldy.
Muzeýiň galan eksponatlary öz ýerinde dur. Langr şäher häkimligi hukuk goraýjy edaralara derrew habar berlendigini aýtdy. Muzeýiň işgärleri häzir ogurlanan teňňeleriň anyk sanyny hasaplaýar.
Langrdaky ogurlyk Parižde Luwr muzeýinde bolan ogurlygyň ertesi güni bolup geçdi. Bu ýerde maskaly jenaýatkärler imperatorlaryň kolleksiýasyndan dokuz eksponaty, şol sanda Napoleona we onuň aýaly Žozefina degişli gymmat bahaly şaý-sepleri ogurlapdy. Luwrda ogurlanan zatlaryň umumy bahasy 88 mln ýewro diýlip hasaplanýar.
