Hytaýda geçen ýyl hödürlenen dünýäde iň tiz CR450 elektrik otlusy synaglaryň dowamynda ýeke otly üçin täze tizlik rekordyny goýdy. Ol sagatda 453 km ýetdi diýip, MyDrivers portaly ýazýar.
Tehniki talaplara doly laýyk gelmek üçin, otly ýolagçy gatnadyp başlamazdan ozal synag režiminde 600 000 km geçmeli.
Hytaý inženerleri soňky bäş ýylyň içinde tehnologiýany kem-kemden kämilleşdirdi. Netijede, otlynyň aerodinamiki garşylygyny 22% azaltmak başartdy.
Sagatda 350 km tizlige ýetýän adaty elektrik otlynyň kelle böleginiň uzynlygy 12,5 metre ýetýär, CR450-de bolsa ol 15 metre çenli uzaldyldy we howanyň garşylygyny peseltmek üçin has ýiti şekile eýe boldy. Otly doly ýapyk bolup, tigirler görünmeýär diýen ýaly, onuň beýikligi bolsa özünden öňki bilen deňeşdirilende 20 santimetr, agramy 50 tonna azaldyldy.
CR450 elektrik otlusy duran ýerinden 350 km/sag çenli bary-ýogy 4 minut 40 sekuntda bat alýar, öňki model Fuxing şeýle tizlige 6 minut 20 sekuntda ýetýärdi.
