Ýewropa Bileleşigi 2028-nji ýyldan başlap sarp ediş elektronikasyny öndürijilerden zarýad berijileri we daşarky energiýa bloklaryny bir umumy ülňi boýunça – USB-C porty bilen çykarmaga borçlandyrjak kanuny tassyklady. Üstesine-de, kabel hökman aýrylýan bolmaly. Tom’s Hardware-iň habar berşi ýaly, täze talaplar enjamlaryň gabat gelijiligini ýokarlandyrmaga we elektron zibilleriň mukdaryny azaltmaga gönükdirilýär.
Düzgün oýun konsollaryndan we monitorlardan başlap, routerlere, simsiz zarýad berijilere we TW pristawkalaryna çenli 240 Wt çenli kuwwatly enjamlara degişlidir.
Her bir zarýad blogunyň, iň bolmanda, bir USB-C porty, aýrylýan kabeli bolmaly we USB Power Delivery (USB-PD) ülňüsi boýunça işlemeli. Şeýle-de, öndürijiler korpusda, portlarda we kabellerde kuwwaty görkezmeli, gabat gelýän gurluşlarda bolsa Common Charger logotipi bolmaly.
Kanun energiýany tygşytlamak boýunça-da düzgünleri girizýär: 10 Wt-den ýokary kuwwatly bloklar hatda enjam sähel energiýa talap edende-de tygşytly bolmaly, simsiz zarýad berijiler bolsa garaşma režiminde az energiýa sarp etmeli. Olaryň energiýa blogy çalşyp ýa-da gaýtadan ulanyp bolar ýaly daşarky bolmaly.
Bu talaplar üznüksiz energiýa çeşmelerine, lukmançylyk enjamlaryna, elektrosamokatlara, welosipedlere we çygly gurşawda ulanylýan enjamlara degişli däldir.
ÝB-niň hasaplamasy boýunça, täze ülňüler her ýyl, takmynan, 1070 TWt/sag elektrik energiýasyny tygşytlamaga kömek eder.
