Sentýabr aýynda elektrik awtoulaglarynyň we plug-in gibridleriň dünýä boýunça satuwy geçen ýylyň degişli aýy bilen deňeşdirilende 26% ýokarlanyp, rekord derejede — 2,1 million birlige ýetdi diýip, Reuters habarlar gullugy Rho Motion barlag kompaniýasynyň maglumatlaryna salgylanyp habar berýär.
Rho Motion-yň maglumat dolandyryjysy Çarlz Lesteriň sözlerine görä, satuwyň üçden iki bölegi — takmynan 1,3 million awtoulag — Hytaýyň paýyna düşdi. Demirgazyk Amerika ýurtlarynda hem rekord hasaba alyndy, sebäbi alyjylar arzanladyşlaryň möhleti dolmanka, olardan peýdalanmaga howlukdylar.
Hytaý dünýäniň iň uly awtoulag bazary bolup galýar — elektrikli we gibrid ulaglaryň ýarysyndan gowragy onuň paýyna düşýär. Ýewropa bolsa Germaniýadaky arzanladyşlaryň we Beýik Britaniýadaky güýçli islegiň netijesinde täze rekord derejesine ýetdi. Şeýle-de, Tesla Model Y awtoulagynyň iň elýeterli görnüşiniň satuwa çykarylmagy bazardaky bäsdeşligi güýçlendirer diýlip garaşylýar.
Sentýabr aýynda Ýewropada satuw 36% ýokarlanyp, 427 541 ulag satyldy. Demirgazyk Amerikada bolsa ösüş 66% bolup, takmynan 215 000 birlige ýetdi. Beýleki sebitlerde-de satuw 48% artdy ýa-da 153 594 ulag satyldy.
“Federal höweslendirmeler ýatyrylandan soň, ABŞ-da islegiň ýylyň soňky çärýeginde ep-esli peselmegine garaşylýar” diýip, Lester belläp geçdi.
