Türkmenistanda 8-nji synp okuwçylary üçin “Geometriýa” we “Ýapon dili” dersleri boýunça täze okuw kitaplary neşir edildi.
“Ýapon dili” atly täze okuw kitaby okuw maksatnamasyna doly laýyk gelýär. Ol maşgaladan we Watandan başlap iki ýurduň medeniýetine çenli sekiz tematiki bölümden durýar.
Bu okuw kitabyň aýratynlygy — sanly tehnologiýalaryň ornaşdyrylmagyndadyr. Tekstler we sözlükler ses ýazgylary bilen üpjün edilendir. Munuň özi okuwçylaryň geplemek we ýazmak başarnyklaryny ösdürip, ýurdumyzda sanly ulgamy ornaşdyrmak boýunça öňde goýlan wezipeleri üstünlikli durmuşa geçirmäge ýardam edýär. Kitabyň ahyrynda iki dilli (türkmen–ýapon) sözlük ýerleşdirilendir.
“Geometriýa” okuw kitaby matematika ugurly ýöriteleşdirilen mekdepleriň 8-nji synp okuwçylary üçin niýetlenendir. Kitap zehinli ýaşlary ösdürmäge gönükdirilip, üç esasy bölümden ybaratdyr:
- «Üçburçlygyň taraplary bilen burçlarynyň arasyndaky arabaglanyşyklar» (gönüburç üçburçlyklaryň aýratynlyklary bilen bilelikde);
- «Dörtburçlyklar» (parallelogram, romb, dörtburçlyk, trapesiýa, Falesiň teoremasy, simmetriýa);
- •«Şekilleriň meýdany» (Pifagoryň teoremasynyň dürli subutnamalary we düşündirişi bilen bilelikde).
