Türkmenistanly talyplar 15 — 17-nji oktýabr aralygynda Magtymguly adyndaky Türkmen döwlet uniwersitetinde himiýa dersi boýunça geçirilen IV halkara olimpiadada bäş altyn medal gazandylar. Olimpiadanyň netijeleri Magtymguly Türkmen döwlet uniwersitetiniň maglumatlar portalynda çap edildi.
Olimpiada şahsy görnüşde A hem-de B derejeler boýunça geçirilip, A derejede himiýa hünäri boýunça okap bilim alýan talyplar, B derejede hem beýleki hünärlerde okaýan ýaşlar özara bäsleşdiler. Meseleler ýokary okuw mekdep maksatnamasyna laýyklykda organiki himiýa, fiziki himiýa, organiki däl himiýa, analitiki himiýa boýunça taýýarlanyldy. A dereje ýazmaça görnüşinde, B dereje test görnüşinde geçirildi.
Magtymguly adyndaky Türkmen döwlet uniwersitetinden Ýakup Annaorazow we Şatlyk Batyrow A derejede altyn medal gazandylar. Bu derejede jemi 14 altyn medal gowşuryldy, olaryň 11-si russiýaly talyplara, biri Belarusyň wekiline berildi.
B derejede türkmen topary üç altyn medal gazandy. Bu derejede Myrat Garryýew adyndaky Türkmenistanyň döwlet lukmançylyk uniwersitetinden Yhlas Jumaýew, Magtymguly Türkmen döwlet uniwersitetinden Arslan Jumaýew we Selbi Paşikowa ýeňiji boldy. Şeýle hem Özbegistandan (dört altyn medal), Russiýadan we Hytaýdan (hersi iki altyn medal) gelen talyplar üstünlikli çykyş etdiler.
Şeýlelikde, A derejede baýrakly orunlaryň 63-si kesgitlenip, şolardan ýeňijileriň 14-si birinji, 17-si ikinji, 32-si bolsa üçünji orna mynasyp boldular. Şeýle hem B dereje boýunça baýrakly orunlaryň 57-si kesgitlenip, onda ýaşlaryň 12-si birinji, 17-si ikinji hem-de 28-si bolsa üçünji orny eýelediler.
Olimpiada Russiýanyň, Azerbaýjanyň, Ermenistanyň, Belarusyň, Angliýanyň, Eýranyň, Italiýanyň, Gazagystanyň, Hytaýyň, Täjigistanyň we Özbegistanyň ýokary okuw mekdeplerinden 100-den gowrak talyp, şeýle hem Türkmenistanyň ýokary okuw mekdepleriniň 23-sinden 150-den gowrak talyp gatnaşdy.
