Hytaýda iPhone Air smartfonlarynyň ilkinji toplumy deslapky satuw başlandan soň bary-ýogy birnäçe minutda satyldy. Diňe eSIM-i (smartfonyň içinde oturdylan we fiziki plastik kartyň ornuny tutýan sanly SIM karty) goldaýan smartfona, Android modelleri bilen güýçli bäsdeşlige garamazdan, alyjylar tarapyndan isleg ýokary bolup çykdy.
Bilermenler gyzyklanmanyň artmagyny Apple-iň baş direktory Tim Kukuň Hytaýa sapary bilen baglanyşdyrýar. Dünýäniň iň uly smartfon bazarynda iPhone Air-i onuň hut özi hödürledi. Şeýle-de, ol ýurduň wise-premýeri He Lifen we söwda ministri Wan Wentao bilen duşuşdy. Duşuşyklarda söwda-ykdysady gatnaşyklar we Hytaýda kompaniýanyň ösüşi ara alnyp maslahatlaşyldy.
Satuw ýerli wagt bilen irden sagat 9-da – beýleki ýurtlaryň köpüsinden bir aý giç başlady. Bary-ýogy birnäçe minutyň içinde smartfon Pekindäki, Şanhaýdaky, Týanszindäki we beýleki uly şäherlerdäki oflaýn-dükanlardan ýok boldy. Onlaýn üpjünçiligiň iki hepdä çenli gijikdirme bilen bolmagyna garaşylýar. Hytaýda iPhone Air-iň bahasy 7 999 ýuandan (takmynan, 1 122 dollar) başlaýar.
Saparynyň dowamynda Kuk Apple-iň Pekindäki “Ançžen” hassahanasy bilen kardiologiýa taslamalary boýunça hyzmatdaşlygyny yglan etdi – amerikan kompaniýasy Hytaýda Apple Watch eýeleriniň sagady ýürek kesellerine gözegçilik etmek üçin ulanmagyny gazanmak isleýär. Şeýle-de, Kuk “daşky gurşawyň goragy ugrunda liderleriň täze neslini taýýarlamakda” kömek etmek üçin Sinhua uniwersitetine haýyr-yhsan bermek barada aýtdy.
