Redmi kompaniýasy 27-nji oktýabrda Hytaýda Redmi K90 hataryny, şol sanda täze K90 Pro Max flagmanyny hödürlejekdigini tassyklady. Şol çärede adaty wersiýa K90-nyň hem görkezilmegine garaşylýar.
Resmi suratlarda ultra-inçe çarçuwaly we yzky panelde uly gönüburç şekilli kamera moduly bolan K90 Pro Max-yň ak wersiýasy görkezildi. Kameradan sagda Sound by Bose ýazgyly dinamik ýerleşýär. Kompaniýa bu modelde sese aýratyn üns beren bolmaly.
Şeýle-de, üýtgeşik jins wersiýasy görkezildi. Onda yzky panel üçünji nesil nano-derisi bilen örtüldi. Korpus ultrabenewşä çydamly bolup, wagtyň geçmegi bilen saralmaýar we hapadan aňsatlyk bilen arassalanýar.
K90 Pro Max-yň bir kristally Snapdragon 8 Elite Gen 5 ulgamyna esaslanmagyna, adaty wersiýanyň bolsa Snapdragon 8 Elite prosessoryna eýe bolmagyna garaşylýar. Smartfonlaryň ikisi-de HyperOS 3 bilen Android 16-nyň dolandyrmagynda işlär. 2K durulykly OLED displeýiniň diagonaly 6,59 dýuým bolar. 7500 mA/sag sygymly akkumulýator 100 Wt çalt simli we 50 Wt simsiz zarýad alşy goldar. Pro Max periskopik teleobýektiwe eýe bolar.
K90 Pro Max flagmany Redmi-niň taryhynda ilkinji Pro Max modeli bolar. Xiaomi-niň prezidenti Lu Weýbingiň aýtmagyna görä, smartfon öz baha segmentinde iň kuwwatlysy bolar.
Halkara bazarlaryna smartfonlaryň Poco brendi bilen çykmagy mümkin: K90 Poco F8 Pro, K90 Pro Max bolsa Poco F8 Ultra bolar. Gürrüňlere görä, täze smartfonlaryň bahasy, takmynan, 560 dollardan başlaýar.
