Alymlar Ortaýer deňzinde uly çuň umman rifini ýüze çykardylar. Bu açyş merjenleriň ekoulgamlarynyň ekologiki funksiýalaryny we umman çuňlugyndaky paýlanyşyny has gowy öwrenmäge kömek eder diýip, The Independent habar berýär.
Rif Neapoluň kenarynda, Dorn kanýonynda, 500 metrden gowrak çuňlukda tapyldy. Barlagçylaryň bellemegine görä, merjenler pes ýagtylykda we ýokary basyşda ýaşamaga mümkinçilik berýän seýrek uýgunlaşmalara eýe. Olar çuňlukda ýaşaýan beýleki umman jandarlary üçin gaçybatalga bolup hyzmat edýän çylşyrymly ekoulgamlary döredýärler.
Täze rif gaty, gara we ýekelikdäki merjenlerden, gubkalardan we beýleki ekologiki taýdan möhüm görnüşlerden durýar. Şeýle-de, alymlar gadymy merjenleriň we ustrisalaryň gatap galan galyndylarynyň yzlaryny, ýagny "uzak geçmişiň geologiki subutnamalaryny" tapdylar.
Ekspedisiýanyň ýolbaşçysy Jorjio Kastellan bu açyşyň Italiýanyň deňizleri üçin aýratyndygyny aýtdy. Onuň sözlerine görä, şeýle görnüşdäki we göwrümdäki biogurluşlar Dorn kanýonynda öň duş gelmändir we Ortaýer deňzinde örän seýrekdir.
Geljekki barlaglar bu görnüşleriň howanyň üýtgemegine we adamzadyň täsirine näderejede çydamlydygyny kesgitlemäge kömek eder. Bu bolsa deňizdäki biodürlüligi gorap saklamak üçin möhümdir.
