Warner Bros. kompaniýasy Legendary bilen hyzmatdaşlykda “Minecraft kinoda” filminiň dowamyny taýýarlaýandygyny mälim etdi. Dowamynyň dünýä prokatyna çykarylmagy 2027-nji ýylyň 23-nji iýulynda meýilleşdirilýär diýip, The Hollywood Reporter habar berýär.
Meşhur wideo oýna esaslanan ilkinji film dünýäde takmynan 958 million dollar girdeji gazanyp, 2025-nji ýylyň iň köp tomaşa edilen filmleriniň biri boldy.
Taslamanyň režissýory öňküsi ýaly Jared Hess bolar, ol filmiň ssenarisini hem Kris Galletta bilen bilelikde ýazýar. Aktýor düzümi entek mälim edilmedi, ýöne birinji bölümde Jeýson Momoa, Jek Blek, Emma Maýers, Daniel Bruks, Jennifer Kulij we Sebastýan Hansen ýaly ýyldyzlar oýnady.
Filmiň ilkinji bölümi çykandan soň, kinoteatrlarda “towuga atlanan çapyksuwar” atly wirusly trend peýda boldy. Ýetginjek tomaşaçylar Jeýson Momoanyň gahrymanynyň towuga atlanan zombi bilen söweşýän pursatyna öýkünýärdiler. Bu ýagdaý sebäpli käbir kinoteatrlarda goşmaça howpsuzlyk çäreleri girizilmeli boldy.
