14-nji oktýabrda irden SpaceX kompaniýasy kuwwatly Starship raketa göterijisiniň on birinji synagyny geçirdi. Geçenki uçuş ýaly bu synag hem üstünlikli tamamlandy.
Raketa ýerli wagt bilen 18:24-de (Aşgabat wagty bilen 4:24) Tehasdaky uçuş meýdançasyndan goýberildi. Kompaniýa X sosial ulgamyndaky sahypasynda missiýany ýaýlyma berdi.
24 sany Raptor hereketlendirijisi bilen enjamlaşdyrylan Super Heavy tizleşdirijisi uçuşdan 10 minutdan soň Meksika aýlagynda gonmak üçin yzyna dolandy. Täze missiýanyň çäklerinde hereketlendirijileriň gonuş wagty täze iş shemasy barlandy.
Ikinji basgançagyň, Starship raketasynyň öz uçuşy 1 sagat 6 minut dowam etdi.
Esasy synag atmosfera girmek boldy. Geçenki synagda bolşy ýaly, SpaceX-iň inženerleri gäminiň adatdan daşary şertlerde berkligini barlamak üçin gorag plitkalarynyň käbirini aýyrdy. Ýaýlym wagty goraga zeper ýetendigi göründi, ýöne muňa garamazdan Starship bu tapgyrdan hem üstünlikli geçdi.
Gämi orbita sekiz sany Starlink hemra maketini çykardy. Şeýle-de, kompaniýa kosmosda hereketlendirijini gaýtadan işletmegi we Ýere gaýdyp gelen wagty gäminiň ygtybarlylygyny ýokarlandyrmaga gönükdirilen kämilleşdirmeleri synagdan geçirmegi başardy.
Ähli hereketlerden soň gämi Hindi ummanynda gondy we ýaryldy.
“Biz bu gün Starship-i yzyna gaýtarmagy meýilleşdirmedik” – diýip, ýaýlym alypbaryjysy partlama teswir berdi.
