New Line Cinema studiýasy “Mortal Kombat” filminiň ikinji bölümi çykmazdan ozal üçünjisini taýýarlamaga girişdi. Deadline neşiriniň habar bermegine görä, täze bölümiň ssenariçisi ýene-de Jeremi Sleýter bolar.
Çeşmäniň maglumatlaryna görä, Warner Bros. kompaniýasy ikinji bölümiň önümçiliginden diýseň kanagatlanýar. Filmiň premýerasy 2025-nji ýylyň 24-nji oktýabryndan 2026-njy ýylyň 15-nji maýyna süýşürildi. Onuň ilkinji treýleri bir günde 107 mln tomaşa ýygnap, franşiza üçin rekord goýdy. Üçünji filmiň sýužeti barada entek maglumat ýok.
Birinji “Mortal Kombat” 2021-nji ýylyň aprelinde çykdy we prokatda 84,4 mln dollar gazandy. Filmiň dowamynyň sýužeti birinji filmiň wakalaryny ösdürýär: Şan Szun (Çin Han) onunjy ýaryş başlamazdan öň Ýeriň çempionlaryny ýok etmäge synanyşýar.
Ssenariçi Jeremi Sleýteriň aýtmagyna görä, täze bölümde tomaşaçylara Mortal Kombat ýaryşynyň özi garaşýar. Onda tanyş gahrymanlar Jonni Keýj (Karl Urban), Lýu Kan (Ludi Lin), Jaks (Mikad Bruks), Sonýa Bleýd (Jessika MakNemi) we täze gahrymanlar Kitana (Adelina Rudolf), Jeýd (Tati Gabriel), Kuan Çi (Deýmon Herriman) we Şao Kan (Martin Ford) peýda bolar.
Sleýter “Mortal Kombat-2-niň” synag görkezişlerinde tomaşaçylaryň filme duýgy bilen seslenendigini belledi.
“Olar gygyryp, ýerlerinden böküp turdy. Her bir degişme tüýs ýerine düşüp, olary haýran galdyrdy. Bu meniň durmuşymda iň gowy pursatlaryň biri” – diýip, ssenariçi aýtdy.
