Lay’s kompaniýanyň taryhynda “iň uly rebrendingi” yglan etdi. Indi her tagamyň gaplamasynda “Hakyky ýeralmadan taýýarlanan” ýazgysy peýda bolar.
Kompaniýanyň geçiren pikir soraşmasy alyjylaryň 42%-iniň Lay’s çipsileriniň gaýtadan işlenen goşundylardan däl-de, fermada ösdürilip ýetişdirilen ýeralmadan taýýarlanýandygyny bilmeýändigini görkezdi.
Daşky üýtgeşmelerden başga-da, brend resepti hem üýtgeder. ABŞ-da Lay’s 2025-nji ýylyň ahyryna çenli emeli ys berijilerden we reňk berijilerden doly ýüz öwrer. Şeýle-de, çipsileri gowurmak üçin zeýtun ýagy (Lay’s Baked hatarynda) we awokado ýagy (Lay’s Kettle Cooked hatarynda) ulanylyp başlanar. Beýleki ýurtlarda önümleriň düzümini üýtgetmek meýilnamalary barada metbugat relizinde habar berilmeýär.
Rebrending “Amerikany ýene sagdyn edeliň” umumymilli başlangyjy bilen gabat geldi. Ol Donald Tramp tarapyndan bellenen saglygy goraýyş ministri Robert F. Kennedi-kiçi tarapyndan goldanylýar. Ozal Prezident Coca-Cola kompaniýasyny içgilerde mekgejöwen şiresiniň deregine çiňrik şekerini ulanmaga ynandyrandygyny aýdypdy. Kampaniýa azyk senagatynda ýokary fruktoza düzümli mekgejöwen şiresi, emeli reňk berijiler we gaýtadan işlenen ösümlik ýaglary ýaly zyýanly goşundylardan ýüz öwürmäge gönükdirilendir.
Ýeralma çipsileriniň brendi bolan Lay’s 1938-nji ýylda German W.Leý tarapyndan esaslandyryldy. Çipsiler 1970-nji ýyldan bäri PepsiCo Inc. kompaniýasyna degişli bolan Frito-Lay tarapyndan öndürilýär. Bu kompaniýa Fritos, Doritos, Ruffles we Cheetos ýaly belli brendler hem degişlidir.
