Amerikaly aktýor Bredli Kuper (“Ýyldyz doguldy”, “Snaýper”) “Ouşeniň on bir dosty” (Одиннадцати друзей Оушена) filminiň prikwelinde Margo Robbä (“Barbi”, “Öz janyna kast edijileriň topary”) goşuldy. Bu barada Deadline we Variety habar berýär.
Prikweliň sýužeti gizlin saklanýar, ýöne wakanyň Denni Ouşeniň (Jorj Kluniniň gahrymany) ene-atasy barada gürrüň berjekdigi we 1960-njy ýyllarda Ýewropada ýaýbaňlanjakdygy mälim.
Filmiň režissýory Li Aýzek Çun bolar, prodýuserlik işini Margo Robbiniň LuckyChap kompaniýasy ýerine ýetirer. Ssenarini Kerri Solomon ýazdy. Filmi 2026-njy ýylda düşürmek meýilleşdirilýär.
Ozal baş gahrymanyň keşbi üçin Raýan Gosling göz öňünde tutulypdy. Film “Ouşeniň dostlarynyň” indiki bölümleriniň hem önümçiligi bilen meşgullanjak Warner Bros. tarapyndan çykarylar. Täze bölümlerde Jorj Kluniniň, Bred Pittiň, Met Deýmonyň we Juliýa Robertsiň gaýdyp gelmegine garaşylýar.
Şol bir wagtyň özünde, Bredli Kuper özüniň üçünji režissýorlyk işiniň – “Bu zat işleýärmi?” dramedisiniň çykmagyna taýýarlanýar. Ol filmde keşpleriň birini hem ýerine ýetirdi. Aktýor Warner Bros. bilen işleşmegini dowam etdirýär we ýakyn geljekde Stiwen Spilbergiň “Detektiw Bullit” filminde-de peýda bolar.
