ABŞ-nyň Prezidenti Donald Tramp 2025-nji ýylyň 1-nji noýabryndan başlap Birleşen Ştatlaryň Hytaýdan harytlaryň importyna 100% gümrük paçlaryny girizjekdigini habar berdi. Bu barada ol özüniň Truth Social sosial ulgamynda ýazdy.
“ABŞ Hytaýa garşy eýýäm hereket edýän gümrük paçlaryna goşmaça 100% paç girizer. Şeýle-de, 1-nji noýabrda biz islendik möhüm programma üpjünçiligi üçin eksport gözegçiligini girizeris” – diýip, amerikan lideri belledi.
Onuň aýtmagyna görä, şeýle çözgüt Hytaýyň söwdada “abaý syýasaty alyp barmagy” we ähli öndürilýän harytlara diýen ýaly eksport gözegçiligini girizmegi bilen baglanyşyklydyr.
Ak tamyň ýolbaşçysy şeýle şertlerde HHR-iň Başlygy Si Szinpin bilen Günorta Koreýada geçiriljek APEC-iň sammitiniň çäklerinde meýilleşdirilen duşuşygyň hem bimanydygyny aýtdy.
Ozal, 2025-nji ýylyň aprelinde ABŞ bilen Hytaý söwda gatnaşyklarynyň ýitileşmegini başdan geçiripdi. Şol wagt Waşington hytaý harytlary üçin paçlary 104%-e, Pekin hem jogap hökmünde 84%-e çenli ýokarlandyrdy. Jogap çärelerinden soň gümrük paçlary, degişlilikde, 145%-e we 125%-e ýetdi, ýöne soň taraplar “söwda ýaraşygyny” gazandy.
Trampyň täze bildirişiniň esasynda amerikan gazna indeksleri birden pese gaçdy: Dow Jones bir gün öň bilen deňeşdirilende 1,9%, S&P 500 2,7%, Nasdaq 3,5% peseldi. CNN-iň maglumatlaryna görä, hytaý importy üçin amerikan paçlarynyň umumy göwrümi indi 130% töweregi bolar.
