Internetde 79 ýaşly Jon Litgouyň HBO-nyň Garri Potter barada täze serialynyň düşürilişinden Dambldoryň keşbinde ilkinji suratlary peýda boldy. Kadrlar X sosial ulgamynda resmi Wizarding World Direct akkaunty tarapyndan hödürlendi.
“Garri Potter we jadygöýiň daşy” romanynyň sahnalary Angliýanyň Kornuoll graflygynda düşürilýär. Suratlarda Litgou önümçilik toparynyň gurşamagynda kenarda gezmeläp ýör. Asyl filmlerdäki Dambldor ýaly aktýoryň uzyn çal sakgaly bolup, saçy yzynda ýygnalan we inçe çarçuwaly äýnek dakynýar. Onuň egninde bolsa zümerret nagyşly gara don we goýy benewşe penjek bar.
Dambldoryň egin-eşigi, Hagridiňki ýaly, filmlerden tomaşaçylar üçin tanyş bolan stili saklaýar. Ilkinji iki bölümiň režissýory Kris Kolambus ozal bu çözgüdi tankytlap, üýtgeşmeleriň bolmagyna garaşandygyny aýdypdy.
Jon Litgou “Interstellar”, “Maýmynlar planetasynyň gozgalaňy” we “Konklaw” filmleri, şeýle-de “Günden üçünji planeta” (munuň üçin “Altyn globus” aldy) we “Ejeňize nähili duşdum” seriallary bilen bellidir.
Aktýoryň aýtmagyna görä, bu keşbe razy bolmak aňsat bolmady. “Bu aňsat çözgüt bolmady, sebäbi ol meniň ömrümiň ahyrky babyny kesgitlär diýip gorkýaryn” – diýip, ol aýtdy.
Garri Potter baradaky serialyň premýerasy 2027-nji ýylda HBO we HBO Max platformalarynda meýilleşdirilýär.
