Beýik Britaniýada Dominic Winter auksion öýünde geçirilen söwdada Albert Eýnşteýniň skripkasy satyldy. Aýdym-saz guralynyň bahasy tas 1,5 mln dollar boldy diýip, guramaçylara salgylanyp, Daily Mail habar berýär.
Skripka 1890-njy ýyllaryň ortalarynda Germaniýada peýda boldy. Eýnşteýn ony Şweýsariýa göçmezden ozal satyn aldy. 1930-njy ýyllarda, nasistleriň hökümetinden gaçyp, ol Germaniýadan ABŞ-a gitdi we öz gymmatly zatlaryny fizik Maks fon Laue berdi. Olaryň arasynda skripka, welosiped we filosofiýa boýunça kitap bardy.
20 ýyldan soň fon Laue bu zatlary Braunşweýgden Margareta Hommrihe sowgat etdi. Olar onuň maşgalasynda 70 ýyldan gowrak saklandy. Auksiona skripkany Hommrihiň ýuwlugy çykardy. Ilkibaşda skripka 270-400 müň dollar bilen bahalandyrylypdy.
Aýdym-saz Eýnşteýniň ömürlik hemrasy bolupdyr. Oňa skripka çalmagy ejesi Paulina öwretdi, alymyň özi bolsa, köplenç, dostlary üçin Mosartyň, Bahyň we Bethoweniň eserlerini ýerine ýetirerdi. Ol skripkalarynyň ählisi “Lina” diýip atlandyrýardy. Alym sazy ylmy oýlanmalarda ünsüni jemlemek üçin ulanýardy.
Geçen ýyl auksionda Eýnşteýniň ABŞ-nyň 32-nji Prezidenti Franklin Ruzwelte ýazan haty satyldy. Ol bu hatynda nasist Germaniýanyň ýadro bombasynyň üstünde işleýändigi barada habar beripdir. Hat üçin tas 4 mln dollar tölendi.
