9-njy oktýabrda Türkmenistanyň Daşary işler ministrliginde Türkmenistanyň daşary işler ministriniň orunbasary Ahmet Gurbanow Malaýziýanyň Premýer-ministriniň Baş syýasy sekretary Datuk Seri Şamsul Iskandar Mohd Akiniň ýolbaşçylygyndaky wekiliýet bilen duşuşygy geçirildi. Bu barada Türkmenistanyň DIM-niň saýtynda habar berilýär.
Duşuşygyň barşynda taraplar türkmen-malaý gatnaşyklarynyň syýasy-diplomatik, söwda-ykdysady we medeni-ynsanperwer ugurlaryndaky wajyp meselelerini ara alyp maslahatlaşdylar. Taraplar birek-birege hormat goýmak we özara gyzyklanmalary nazarda tutmak ýörelgelerine esaslanýan köpýyllyk hyzmatdaşlyk gatnaşyklaryny geljekde işjeňleşdirmek babatda pikir alyşdylar.
Duşuşyga gatnaşyjylar ikitaraplaýyn söwda-ykdysady gatnaşyklary ösdürmek babatda pikir alyşdylar, munda maýa goýum ulgamy ileri tutulýan ugur hökmünde bellenildi. Şunuň bilen baglylykda, taraplar Kuala-Lumpur şäherinde Türkmenistanyň ykdysadyýetine daşary ýurt maýa goýumlaryny çekmek boýunça Halkara forumyň üstünlikli geçirilendigini bellediler. Nebitgaz ulgamyna, şol sanda Türkmenistanyň Malaýziýanyň “Petronas” kompaniýasy bilen köpýyllyk hyzmatdaşlygyna aýratyn üns çekildi.
