Apple komediýa görnüşinde 8 minutlyk mahabat wideosyny çykardy. Onda kompaniýa ulgam bökdençliginde peýda bolýan hemmelere belli bolan “mawy ölüm ekrany” (Blue Screen of Death, BSOD) üçin Windows kompýuterlerini ýaňsylaýar.
Mahabatda Apple-iň önümleriniň kömegi bilen üstünlige tarap ýolda kynçylyklary ýeňip geçýän toslanyp tapylan ofis işgärleriniň topary - “The Underdogs” peýda bolýar. Olaryň Container Con sergisindäki ilkinji çykyşy Windows kompýuterlerinde bökdençlikleriň ýüze çykyp, BSOD-y görkezmegi sebäpli şowsuzlyga ýakynlaşýar. Ýöne ýüze çykan mesele Mac ulanyjylaryna täsir etmeýär, netijede topar wezipeden üstünlikli baş çykarýar.
Wideoda şeýle diýilýär: “Eger siziň PK-ňyz möhüm iş wagty bökdeýän bolsa, belki, Mac-y barlap görmegiň wagty gelendir.
Kampaniýa, aýratynam, korporatiw sektorda Windows ulanyjylaryna gönükdirilýär. Apple M seriýaly çipleriň ýokary öndürijilik, energiýa taýdan netijelilik we durnuklylyk bilen tapawutlanýandygyny hem-de BSOD ýaly näsazlyklara duçar bolmaýandygyny belleýär.
“Mawy ölüm ekrany” ilkinji gezek ulgam ýalňyşlygy barada duýduryş hökmünde Windows-yň irki wersiýalarynda peýda boldy. Iň belli ýagdaý Windows 98-iň tanyşdyrylyşynda bolup geçdi, şol wagt ulgam Bill Geýtsiň bar wagty göni tanyşdyrylyş wagty bökdedi. Köpçülik muňa şowhunly el çarpyşmalar bilen seslendi, kompaniýanyň wekili bolsa ötünç sorap, munuň entek ulgamyň işlenilýän wersiýasydygyny düşündirdi.
Wagtyň geçmegi bilen Microsoft ekranyň daşky görnüşini üýtgetdi, Windows 11-de bolsa ol gara boldy.
Ulanyjylar Apple-iň täze mahabatyny geçen ýyl CrowdStrike howpsuzlyk täzelenmesinden soň ýüze çykan Windows kompýuterlerindäki global bökdençlige kakdyrma hökmünde kabul etdi.
Häzir BSOD seýrek duşýar, ýöne Apple-iň mahabaty Windows 10-uň goldawynyň tamamlanmagy we Windows 11-e geçilende käbir çäklendirmeleriň bolmagy bilen gabat geldi. Şunuň bilen baglylykda, kompaniýa enjamy täzelemek ýa-da ekoulgamy çalyşmak meselesi bilen ýüzbe-ýüz boljak ulanyjylary hem özüne çekmäge çalyşýar.
